Rom 7 | DOB | STEP | Gosegwao, ni'atu Mosese 'ina loina wamwalamwalatoni tai yawasina 'ina tauya manuna. Tuta nina 'abo tai 'imwamwawasa, geya'abo wate 'ina loina 'imiyami.

Romans 7

Ai 'enega 'iloesawa'i'i

1 Gosegwao, ni'atu Mosese 'ina loina wamwalamwalatoni tai yawasina 'ina tauya manuna. Tuta nina 'abo tai 'imwamwawasa, geya'abo wate 'ina loina 'imiyami.

2 'Enega 'ebe'ita 'ebweu gete tada 'ita ai manuna. Manuna Mosese 'ina loina 'ena 'igwae 'aene waine mamwanena sida miyami 'ana laba mwawasa, ta esi tuta nina 'abo mwanena 'imwamwawasa geya'abo wate loina 'enega 'ilobaloba. 3 Ta 'abo waine nina mwanena 'imiyami be mali tai 'iai, nate ni'atu 'iloelata. Ta esi 'eguma mwanenana 'imwamwawasa be mali tai 'iai nate nigeya loelata, manuna gimi mwanena ni'atu 'ina loina 'enega 'igumwala.

4 E'ita gete 'ilobwene 'ai'ailimi, manuna gete tuga 'omi ni'atu Mosese 'ina loinega wagumwala, manuna Keliso oona ma'emi wamwawasa ga wate ma'emi mwawasega watoolo limana. Totoolo limana nina tauna 'ida 'Inapwana auwauna, be 'enega ma'edai Yaubada 'ina guinuwa 'ena tada gwaunuwa 'ai'aila.

5 Manuna 'abo'ada lowa tabubuna me bale'u nadigega, 'anabwa'ayoi Mosese 'ina loina 'edaya 'imiyami, ta tuwa tuga 'ida yalakwaiyao siewaiwai ga welawela'ada maibo'ana sibubuna to'umalina, 'enega 'ana e'isa taloba, mwawasa.

6 Ta esi gete tuga loina nina ni'atu 'edaya 'igumwala, manuna lowa loina nina 'enega 'atuwa 'iyonida ga tamwawasa Keliso ma'eda, 'enega Keliso nina 'ada yona 'ili'amina ga gete tuga sawesawedaya be taguinuwa 'ai'aila, manuna Yaubada Yaluyaluwana 'ina waiwai 'edaya 'imiyami, ta esi Mosese 'ina loina nina 'eto'etoladina nigeya 'ina waiwaimo be 'igie palupaluyeda.

'Ida to'umalina manuna

7 'Enega mwa'adega taona'esa Mosese 'ina loina manuna? 'Aene 'ina loina nidi to'umalidi, aga? Nigeya! Ta esi 'eguma loina nidi geya'abo siapweapwesa, geya'abo wate to'umalina siapweapwesa. Nadigega 'abo nigeya 'ebweu loina 'ina simana nadigega 'igwae, “Geya'abo matagwegwe,” geya'abo wate yamwalamwalatoni to'ase matagwegwe. 8 Loina gete 'enega 'igu to'umalina 'igiewaiwaiye, be yamatagwegwe yage yauna manudi, 'enega 'abo nigeya loina, geya'abo wate to'umalina.

9 'Abo'agu wate nadigega lowa mayawasigu yamiyami, nigeya 'ebweu wate loina 'eguya 'imiyami, ta tuta nina loina 'iapwesama ga to'umalina 'eguya 'iewaiwai, 10 ga 'enega loina nina 'iloemwawasigu, manuna loina bobo'ana, yawasida manuna, ta esi 'abo'agu loina nina nigeya yamulimuliya 'ai'aili. 11 Manuna to'umalina nina 'ikaboegu ga loina 'enega 'iloemwawasigu.

12 Ta loina nina tamwalatonina 'aene 'esasena, ta wate 'etobodao maibo'adi 'esasedi ta palupaludi, ta wate maibo'adi bobo'adi. 13 Ta mwa'adega sana loina nina bobo'ana ta 'iloemwawasigu? Ona'ai'aila, nigeya sawesawenaya be yage bobo'ana 'iloemwawasida, ta esi to'umalina 'ateguya loina bobo'ana 'ieyowena ga 'enega 'iloemwawasigu, 'enega tamwalatonina 'aene bubuna to'umali 'ai'ailina 'atedaya 'imiyami, ta loina 'enega tamwalamwalatoni 'aene to'umali wawasaena.

Yaluyaluwada be bwalada 'idi guinuwa

14 Mosese 'ina loina nina ni'atu tamwalatonina 'aene Yaubada Yaluyaluwana 'enega 'imai, ta esi 'abo'agu 'igu bubuna bale'u, 'enega yaetoguinuwa to'umalina 'enaya. 15 Ta sa'i nigeya yasinasinapuna to'ase 'alena yage nidi yaguiguinuwedi, manuna to'ase geya nuwagu 'iabe yaguinuwei, ta sa'i to'ase nuwanuwagu nigeya yada guinuwena. 16 Ta ona'ai'aila, Mosese 'ina loina nidi ni'atu ya'awa bobo'anedi, manuna to'umalina nina yaguiguinuwei nigeya 'ilobwelobwenegu, 17 manuna nigeya 'abo'agu 'eguyega ta esi lotoona to'umalina 'ateguyega. 18 Yamwalatonina nigeya 'ebweu wate bubuna bobo'ana bwalaguya 'imiyami, manuna bubuna bobo'ana nuwanuwagu ta esi nigeya sawesaweguya be yaguinuwe. 19 Ta ona'ai'aila, nuwanuwagu be yabubuna bobo'ana ta sa'i nigeya nadigega yada bubuna'esa, manuna to'umalina nina geya nuwagu ta yaguiguinuwei. 20 Gete 'enega tamwalatonina to'umalina nina yaguinuwena nigeya 'eguyega, ta esi lotoona to'umalina 'ateguyega. 21 Yage getedi ni'atu sie'ita 'ai'ailigu 'aene to'ase bobo'ana nuwanuwagu be yaguinuwe, 'iabe to'umalina tuga yada guinuwe. 22 Manuna yage gete yalobena 'aene yaluyaluwagu nuwanuwana be Yaubada 'ina loina yaguinuwe, 23 ta esi mali loinao 'ediyega welawela'agwao siloinegu. Tuta yauna lotoona to'umalina 'ateguya 'iewaiwai wawasae be 'igu nuwanuwa bobo'ana 'igieneneta, 'enega bwalagu 'iguiguinuwa to'umalina.

24 Nuwa'ole'olegu sa'i! Manuna nigeya 'ebweu yaita sawesawenaya be bwalagu 'ina guinuwa to'umalina 'enega 'ida 'etoseyegu. 25 Ta esi yalokagutoki Yaubada 'enaya, manuna 'ida 'Inapwana Yesu Keliso 'enega 'i'etoseyegu. 'Enega 'igu miya gete nadigega 'abo'agu 'ateguya yatagwala 'ai'aila Yaubada 'ina loina 'enaya, ta sa'i bwalagu nuwanuwana loina to'umalina.